🎩 4個必學長髮 X 帽子配搭法

🎩 4個必學長髮 X 帽子配搭法

秋冬係戴帽嘅季節!天氣轉涼,好多女仔都鍾意戴唔同類型嘅帽,感覺更溫暖之餘,亦令髮型無咁易畀風吹散。

長髮女生,戴上唔同款式嘅畫家帽、冷帽、cap帽……簡單變出唔同style,即時提升時尚度!快啲睇下配搭貼士啦!


Style 1:長直髮+畫家帽=文青風

今季非常流行毛呢質感畫家帽!如果妳擁有一頭長直髮,或者自然微鬈曲長髮,配上畫家帽,都可以畀人書卷味,同法式優雅感。

 

Tips:

  • 畫家帽不宜太大,否則會顯得累贅同誇張。
  • 戴畫家帽時必須夾起瀏海,而且帽子應戴在眉毛之上位置,切忌過低。
  • 戴帽時,輕輕傾斜帽子,或者向後拉,都有唔同感覺。
  • 怕戴帽顯臉大,可以將頭髮放置一側,就可以輕易修飾臉型。

 

Style 2:波浪捲髮+冷帽=溫暖系

Skinny薄冷帽百搭有型,粗織厚冷帽就夠晒溫暖感!配搭冷帽,頭髮唔需要太貼服,帶凌亂感嘅鬈曲秀髮,可以提升造型層次感。而披肩波浪捲髮配上毛毛球冷帽,更特別有節日氣氛,畀人溫暖甜美嘅感覺。

 

Tips:

  • 冷帽唔好戴得太低,要露出耳仔同額頭,帽子頂部自然垂落,比例會更好睇。
  • 冬天通常會著得灰灰沉沉,如果配上一頂色彩明亮嘅冷帽,就可以成為造型焦點。

Style 3: 編髮+寬邊帽=甜美Look

闊邊帽本身畀人成熟老氣嘅感覺,如果擁有一頭靚長髮嘅話,可以以編髮玩出唔同花樣。戴上帽子嘅時候,可以將露出嘅頭髮編成雙鬢辮、麻花辮,或低髮髻,都能減少頭髮厚重感,更添甜美俏皮嘅時尚氣息。

 

Tips:

  • 戴闊邊帽應避免披散亂髮,髮型要露出耳仔和頸部,因為呢款帽型會較掩蓋面部,如果遮得太多,會顯得冇精神。
  • 紮辮子時,記住唔好紮得太緊,否則會顯得老氣。紮辮子後可輕輕拉鬆頭髮,製造出蓬鬆感,同埋可拉出兩側髮絲任由隨意散落,就會更自然,亦有瘦臉效果。

 

Style 4: 隨性長髮+Cap帽=街頭風
朝早起身唔駛刻意打理,只需一頂Cap帽,同將長髮/柔軟曲髮繞到耳後,就可以隨性自信咁出街!而反戴棒球帽,配上衞衣、球鞋等運動風或街頭風衣著,更可營造率性有型嘅韓國look。

 

Tips:

  • Cap帽帽舌唔好向上,要平放向前先至啱。
  • 戴Cap帽可束一條低馬尾,營造清爽感覺,再喺額頭耳側拉出小束髮絲,就可以輕易修飾臉型。

Comments

comments